Кавалеўскі: «Пуцін глядзіць на Украіну і Беларусь аднолькава: у яго разуменні, гэта краіны, якія незалежныя толькі часова»

— Нагодаў для хвалявання ў Лукашэнкі сёння больш чым дастаткова, — разважае на Еўрарадыё Валер Кавалеўскі. — Сітуацыя і ў Беларусі, і навокал застаецца даволі адчувальная.

Той самы расійска-амерыканскі дыялог па заканчэнні вайны супраць Украіны можа развівацца і такім чынам, што закране інтарэсы Беларусі і нашкодзіць ім.

На мой погляд, гэта адна з ключавых пагрозаў таго, што можа адбыцца з нашай краінай у выніку, калі будзе заключаны мір па Украіне. Пакуль бачна, што сітуацыя развіваецца не вельмі добра, прагрэсу асабліва няма, ваеннае супрацьстаянне працягваецца.

Сам Пуцін не разумее, у чым могуць заключацца нацыянальныя інтарэсы Беларусі. На нядаўняй прэс-канферэнцыі ў Маскве ён са здзіўленнем адрэагаваў на адпаведнае пытанне, маўляў, пра якія нацыянальныя інтарэсы вы гаворыце.

У той жа момант відавочна, што Расія ўжо досыць далёка прасунулася ў тым, каб умацаваць кантроль над Беларуссю фактычна ва ўсіх сферах — і ў ваеннай, і нацыянальнай бяспецы, і ў эканоміцы, і ў фінансах, і ў знешняй палітыцы.

Размяшчэнне ядзернай зброі на тэрыторыі Беларусі ці тое пагадненне аб гарантыях бяспекі з боку Расіі ствараюць новыя пагрозы для нашай краіны. Не выключаюць, а менавіта ствараюць. У тым ліку гэта пагражае тым, што Беларусь можа быць уцягнутая ў вайну.

Таксама існуюць санкцыйны ціск, фінансавы і дэмаграфічны. Тое, што людзі з'язджаюць, — гэта таксама стварае пагрозы для краіны. Адбыліся сур'ёзныя змены, якія сапраўды пагражаюць Беларусі.

Кавалеўскі ўпэўнены, што Лукашэнку добра вядома пра ўсе пералічаныя пагрозы, але праблема ў тым, што менавіта ён і з'яўляецца прычынай шмат якіх з іх.

— Думаю, што Лукашэнка адчувае сур'ёзную вельмі неспрыяльную кан'юнктуру для нашай краіны і для сябе асабіста.

Насамрэч ён у гэтым стане жыве даўно. Спачатку ставілі пад сумнеў яго здольнасць кіраваць краінай, тое, што ён утрымае ўладу.

Пасля шмат казалі пра тое, ці не здасць ён Беларусь Расіі, ці зможа тая захапіць нейкія фінансавыя ці матэрыяльныя інтарэсы нашай краіны пад свой кантроль.

Ці зможа ён выстаяць у розных крызісах, напрыклад, такіх як анексія Крыма. Добра памятаю, як ён тады вельмі адчайна зманеўраваў, каб Расія не паўтарыла падобную схему з Беларуссю.

Таму што Пуцін глядзіць на Украіну і Беларусь аднолькава. У яго разуменні, гэта краіны, якія незалежныя толькі часова і рана ці позна яны вернуцца ў «карону Расійскай імперыі».

Лукашэнка гэта разумее і пасля захопу Крыму ён зрабіў усё, каб Беларусь засталася больш-менш нейтральнай.

Але сёння гэтая сітуацыя паўтарылася ўжо ў значна больш драматычных і трагічных маштабах. Лукашэнка таксама спрабуе нейкім чынам адграбсці, каб яго не зацягнула. Аднак у яго вельмі кепска атрымліваецца, таму што ўсё ж такі ён вельмі абавязаны Пуціну за тое, што застаўся ва ўладзе.

Яму трэба разлічвацца па сваіх даўгах. Але гэта не азначае, што ён не разумее той пагрозы, якая створана і для яго сям'і, і для яго інтарэсаў, і для ўсёй краіны, — лічыць палітык.